BOST MINUTUKO IKASTAROA!

GRAMATIKA

“Nik pertsonalki” eta antzeko erderakaden ordez, “nik neuk” erako esapideak erabili behar ditugu.

Ni pertsonalki ez nago ados.             Ni neu ez nago ados

                        Ni behintzat ez nago ados.

                        Ni, behinik behin, ez nago ados.

Guk pertsonalki ez dugu ikusi.           Guk geuk ez dugu ikusi.

                         Guk, behintzat, ez dugu ikusi.

                         Guk, behinik behin, ez dugu ikusi.

ARTIKULUA

Deskortesia

Anjel Lertxundi

Liburu-dendan, iritsi berri diren nobedadeen usnan. Hartu dudan liburuetako baten portadak eta tituluak erakarri naute. Egileak ere konfiantza ematen dit, haren hizkera dotorea baita eta kontatzen dituen istorioak, interes dezentekoak. Kontrazalean, ohi denez, liburuari buruzko laudorioak, baina ukitu ironiko batez esanak. Gero eta erosgarriagoa egiten ari zait liburua. Zabaldu, eta lehendabiziko orriari, kortesiazkoa deitzen zaionari, erreparatu diot. Eskaintza labur bat dakar:

“Sarari, berak badaki zergatik”.

Liburua erosteko gogo guztiak joan zaizkit. Suposatzen da autoreak irakurleentzat idatzi duela liburua. Zuretzat, niretzat. Baina hasiera-hasierako esaldian, kortesiazko atarian, deskortesia itsusi hori, informazioa ukatzen didana, Sararen eta egilearen arteko sekretutik kanpo uzten nauena.

Esku hutsik irten naiz dendatik. Ordutik, galdera bati bueltaka ari naiz: zer ote da Sarak dakien hori?

Advertisements